لماذا تضربنى ؟؟؟!!!

اسمحولى اتكلم عن حاله المسيحيين فى البلد اليومين دول ... مش عايزة حد يتضايق من كلامى انا هاعرض وجهه نظرى اللى متأكدة ان فى كتير هايعترضوا عليها لكن معلش الحقيقة دايما بتوجع ... الباب دايما مفتوح للنقاش و طرح وجهات النظر المختلفة فى كل الموضوعات ..

المهم بعد اللى حصل فى ماسبيرو يوم الاحد اللى فات كنت حاسه ان ده بدايه الثورة الثانية فعلا ... الشباب اللى اعرفهم كلهم نزلوا مسلمين و مسيحيين ... شافوا ان دى "مش جريمة طائفية لكن دى مذبحه عسكرية"  نزلوا تانى زى ايام الثورة ايد واحده ضد الظلم و القتل و دم البنى ادم اللى بقى رخيص ... استغربت قوى من المسيحيين اللى قبلوا انهم يصلوا على ولادهم بدون تشريح او تقرير طبيب شرعى .. علشان ياخدوا بركة "سيدنا" !!!! يعنى سورى يعنى سيدنا لو صلى عليهم هايروحوا السما "الجنة"  و لو ماصلاش عليهم هايروحوا النار "جهنم"؟؟؟ حاجه غريبة فعلا ؟؟؟ و ده يخلينى اقولكم قصة و بعدها اكمل لكم اللى عايزة اقوله

مجموعة من العلماء حطوا 5 قرود في قفص واحد و في وسط القفص كان فى سلم و فوق السلم كان فى شوية موز

في كل مرة يطلع واحد من القرود علشان ياخد موزه العلماء كانوا بيرشوا باقي القرود بمياة ساقعة وبعد فترة بسيطة بقى كل قرد يطلع ياخد الموز, يقوم الباقين يمنعوه و يضربوه علشان محدش يرشهم بالمياة الساقعه ... بعد فترة وصلوا لان محدش بقى عنده الجرأة يطلع السلم و ياخد الموز بالرغم من كل الإغراءات بس كانوا خايفين من الضرب بعدها ... فقرر العلماء أنهم يبدلوا واحد من القرود الخمسة و يحطوا مكانه قرد جديد فأول حاجة يعملها القرد الجديد أنه يطلع السلم علشان يأخذ الموزولكن فورا الأربعة الباقين يضربوه و يجبروه انه ينزل..بعد كام مرة  من الضرب يفهم القرد الجديد بأنه مش المفروض يطلع السلم مع أنه مايعرفش ايه السبب .. و شوية تانى و العلماء بدلوا واحد القرود القدام بقرد جديد وحصل له زى ما حصل فى القرد البديل الأول وحتى أن القرد البديل الأول كان بيشارك القرود التانيين فى ضربه وهو مش عارف هما ليه بيضربوا القرد الجديد....  و بالطريقة دى العلماء بدلوا الخمس قرود اللى كانوا فى الاول خالص فى القفص بقرود جديدة .. لدرجة ان الخمس قرود اللى كانوا فى القفص مفيش ولا واحد فيهم اترش عليه مياة بارده ابدأ !! وبالرغم من كده كانوا بيضربوا اى قرد كان بيقرب من السلم بالرغم انهم مش عارفين ايه السبب !!! لو فرضنا .. و سألنا القرود ليه بتضربوا القرد اللى بيطلع السلم؟أكيد سيكون الجواب :مش عارفين ولكن احنا لقينا آباءنا وأجدادنا بيعملوا كده 

عملياً ده اللى احنا بنطبقه و نعمله فى حياتنا كل يوم و فى اغلب ردود افعالنا بنخاف نغير الروتين فى شغلنا و حياتنا اليومية و حتى فى ديننا !!! لكن النتيجة اننا بقينا أسرى  لغباء متراكم بيزيد مع مرور الأيام وبنفتخر بهذا "الغباء" الذي خدعنا بتستره تحت عباءة إسمها“العادات والتقاليد والتدين"

مشكلتنا ان عاداتنا و تقاليدنا حتى الدينيه بقت فعليا بتسمح اننا -سورى فى الكلمة- ناخد على قفانا و نقول كماااااااااااان !!!

مش هو ده الدين اللى انا عرفته .. السيد المسيح لما اتضرب سأل الجنود "لماذا تضربنى"

و على الناحية التانية ... احترمت جدا موقف الاسر اللى وقفت ضد الظلم و التقارير المفبركة ... الناس اللى حست ان ولادها استشهدوا علشان مبدأ محترم .. علشان قضية مؤمنين بيها و ماينفعش دمهم يروح "ببركة سيدنا"..

علشان اكون كمان امينه معاكم فرحت قوى لما المجمع المقدس اعلن صيام تلات ايام و شفت كل الناس بتصوم و بتصلى من قلبها علشان تطلب من ربنا يتدخل و يشيل الظلم اللى حسينا بيه .. شفت طفله عندها 9 سنين بتصوم كل يوم من الساعه 12 بالليل لغايه 6 بعد الضهر تانى يوم .. كانوا اهلها بياكلوا من الساعه 3 و هى تقول لأ انا هاكل مع غروب الشمس و كانت بتقعد تصلى و تبكى بالدموع علشان ربنا يعزى اهالى الشهداء و ينصر ثورتنا و يرسيها على بر امان ..

انا ماكنتش ناوية اكتب عن الموضوع ده لغايه لما شفت "البابا" امبارح شفته و هو رافض رفع قضية دولية و مستنى عدالة السماء !!! و شفت قد ايه الشعب المسيحى بدأ يفوق و يرفض انه بس يستنى عدالة السماء او بكلمات تانى يتواكل على ربنا ... انا اللى اعرفه اننا لازم نعمل اللى علينا و نطلب تدخل ربنا فيه ... لكن مش احط ايدى على خدى و اقوله يارب تعالى انت بقى اتصرف .... ده نوع من التواكل و الاعتماديه العقيمة اللى المؤسسة الكنسية كانت بتربينا عليها من صغرنا .... ربنا موجود "و علشان اكون واضحه انا مش معترضه على مبدأ ان ربنا موجود علشان انا عارفه الناس بتقف على الكلمة"

فى الاخر احب اسألكم سؤال .. عايزين تكونوا زى القرود الاغبياء اللى خايفين يتحركوا او حتى يسألوا احنا ليه خايفين نطلع السلم ؟؟؟ ولا هاتكونوا زى الشجعان اللى وقفوا قدام البابا امبارح و قالوله احنا مش هانسكت ولا هانسيب حق ولادنا و شهدائنا يروح هدر؟؟؟

موقفك هو قرارك وحدك ماينفعش حد يقولك اعمل ايه

 ... فكروا كويس قبل ما تجاوبوا على السؤال ...

للأسف مش اى كلام

كان نفسى المرة دى كمان اكتب اى كلام ... بس لاننا رجعنا تانى ليوم جمعه الغضب فالكلام اللى جاى هو كلام مهم جدا ماينفعش تسمعه من ناحيه و تطلعه من ناحيه تانى .. او تعتبره ما اتقالش .. النهاردة سقط اكتر من 30 شهيد مصرى على ايد الجيش المصرى اللى يؤسفنى انى اقول عليه "غادر" بيقتل ولاده و بيحط ايده فى ايد اعدائه .... الكلام اللى جاى ده هو شهادة ستيف نبيل واحد من اللى كانوا فى مسيرة شبرا و طلعوا بعدها على ماسبيرو و عاين كل الاحداث اللى حصلت بيحكى اللى حصل لحظة بلحظة .. انا هانقل الشهادة زى ما هى و مش هاعلق عليها لان الكلام اللى فيها كافى قوى انه يوضح حقايق كتير احنا مصرين اننا نغفل عنها ... مش هاتكلم معاكم عن الشهداء و عن اهاليهم ا للى قلبها متقطع على اولادهم الشباب اللى راحوا النهاردة علشان انا مش بكتب لاستجداء العطف من الناس على حال ناس اتقتلت ... انا بس بكتب علشان الحقيقة


و دلوقتى اسيبكم مع شهادة ستيف كاملة:


(Via @SteveNabeel) انا هحكى اللى حصل النهارده و شفته بعينى ... مستعدين تسمعوا ؟؟؟؟
المسيره بدأت من دوران شبرا .. انا وصلت الساعه 3 و ربع .. و هما كانوا مقررين هيتحركوا الساعه 4 على ماسبيرو.. الهتافات كنت بتوتها .. كان فيه منها طائفى من وجهة نظرى .. زى ارفع راسك فوق انت قبطى.. بس معظم الهتافات كانت ضد العسكر و ضد المشير .. و كان فيه اعتقاد كبير ان الاحداث ضد الاقباط من تدبير المجلس.. و زى ما كتبت .. عمرى ما سمعت العدد ده كله بيهتف ضد العسكر .. العدد فضل يزيد يزيد بشكل مهول .. المهم وصلنا اول شارع شبرا.. عند اول شارع شبرا قابلت لبنى و العدد كان وصل ممكن ل 100 الف بدون مبالغه.. لما نزلنا نفق شبرا .. كان فيه ناس بتحدف طوب علينا من فوق . المهم تجاهلناهم و هربوا فى الشوارع الجانبيه و كملنا المسيره .. العدد كان زاد اكتر.. المهم .. لبنى المصريه المسلمه سحبتنى من قدام ربع نقل كان على وشك انه يدوسنى :))@lobna.. وصلنا عند هيلتون رمسيس .. كان فيه نشطاء مستنينا اصلا عند ماسبيرو .. كانوا فاكرين العدد مش هيبقى كبير قوى .. لقوا مسيره 200 الف واحد.. فيه ناس مشيت من عند الكورنيش و ناس لفت من ورا رمسيس هيلتون .. اول ما وصلت جنب ماسبيرو .. لقيت الناس بترجع جرى و العساكر جايه علينا.. كان فيه صوت رصاص كتير .. معرفش حى ولا مطاطى ولا ايه .. جرينا اخر الشارع و لفيت من عند الكورنيش.. و شفت بعينى ..مدرعتين جيش طالعين علينا بسرعه و الناس بتجرى منهم .. واحده منهم دهست اتنين تقريبا راحت الناس اتلمت عليها و ولعوا فيها.. المدرعات و هى جايه كانت بتخبط العربيات اللى راكنه و تقلبها كمان.. و الناس كانت بتضرب طوب على المدرعه المولعه .. و كل ما يحاول العسكرى اللى فيها يخرج الناس بترميه بالطوب.. قعدنا نهتف سيبوه يخرج.. الناس سابته يخرج .. بس اول ما طلع فشخوه ضرب :)))) .. و بعدين لقينا المدرعه التانيه جايه علينا بسرعه جنونيه.. المدرعه التانيه دهست قدام عينى مش اقل من 15 واحد .. الناس كانت بتطلع على الرصيف كانت بتطلع وراهم .. دهست مش خبطت.. ابتدينا نشيل فى الجثث و ندخلهم فى العمارات و نجرى .. و هرج و مرج.. غالبا في الوقت ده كان الجيش زاع البيان الوسخ بتاعه.. طوب و هرج و مرج .. رجعنا عند منزل الكوبرى قدام هيلتون رمسيس .. و قابلت تويبس كتير الناس فاكرينهم فرافير و هما بميت راجل .. ولاد و بنات.. ابتدينا الكر و الفر مع الجيش .. و هما ابتدوا يضربوا غاز .. غريب فشخ .. مالهوش لون ولا دخان زى القديم .. فجأه تحس بيه و متعرفش مصدره.. فى نص الهرج و المرج مذيعتين امريكان سجلوا معايا .. بيسألونى هو مين اللى بيضرب .. الجيش ولا السلفيين . قلتلهم لا الجيش . :D.. و قلت للاتنين الامريكان على فكره احنا مش عايزين تدخل اجنبى ولا حمايه دوليه من حد .. و روحوا دلوقتى عشان باسبوركم مالهوش لازمه لو اتمسكتوا.. و بعدين اترمى الغاز .. فجريت تانى على منزل الكوبرى .. و ابتدينا نرمى زلط و هما يرموا علينا زلط و يضربونا بالمطاطى.. جريت نحية التحرير علشان اجيب خل .. علشان البيبسى معملش اى حاجه النهارده .. جبته من بقال فى شارع جانبى . رجعت لقيت الوضع اختلف فشخ.. لقيت ناس عند تمثال عبد المنعم رياض بيضربوا طوب على ناس برضه تحت الكوبرى .. حاجه شبه موقعة الجمل كده.. بقيت اسأل دول اقولهم انتوا بتضربوا مين .. يقولولى دول بلطجية المجلس.. .. لفيت الناحيه التانيه باعجوبه سالت التانين انتوا بتعملوا ايه . قالو بنطهر البلد من النصاره ولاد الكلب .. بقيت اقولهم يا جدعان انتوا بتضربوا بنات محجبات .. مفيش حد بيسمع ... رجعت تانى ناحية التحرير .. و كر و فر .. و طوب و جرى حبه حلوين كده.. و بعدين لقيت فجأه الناس الناحيه التانيه رفعوا ايديهم , و قالوا احنا تبعكوا.. و الناس شالوا شيخ سلفى و قعدوا يقولوا مسلم مسيحى ايد واحده .. و المجموعتين انضموا على بعض و العدد كان فشيخ جدا.. المهم .. الشيخ السلفى كان بيهتف مسلم مسيحى ايد واحده و الناس تهتف وراه و طالعين على ماسبيرو.. و احنا ماشين لقيت واحد بيقول اسلاميه اسلاميه .. رحت ماسكه من قفاه و قلتله .. انت بتشعللها ليه انت مدسوس ولا مخبر .. راح عمل عبيط و سكت.. وصلنا عند ماسبيرو باعداد فشيخه .. و العساكر كانوا عاملين كردون ..الهتاف كان يسقط يسقط حكم العسكر .. و فجأه قلب الجيش و الشعب ايد واحده.. و لقينا عساكر الجيش بتتطلع على الكوبرى و ترمينا بالظلط .. بعدين لقينا اعداد كبيره من المواطنين الشرفاء معاهم على الكوبرى بيرمونا بالطوب.. العساكر طوقونا من الناحيتين .. فهربنا على شارع رمسيس .. كان فيه عساككر و مواطنين شرفاء عند ماسبيرو و عند مدخل التحرير.. و المواطنين الشرفاء زادوا فشخ و ابتدوا يهتفوا اسلاميه اسلاميه .. و الشعب يريد تطبيق شرع الله .. و النصارى فين الاسلام اهو.. عسكرى بيقول للمواطنين الشرفاء .. ياللا خلونا نطهر البلد من النصارى الانجاس.. لما لقينا اننا قليلين فشخ .. و وش هنتمسك .. اتحركنا من شارع رمسيس على وسط البلد .. و فضلنا بس نكلم بعض و نطمن .. و نتلم.. خرمنا من وسط البلد على التحرير .. لقينا العساكر سادين الشارع .. حاولنا نهتف ضدهم .. بس كنا قليلين ,, و واحد فيهم ضرب برشاش الى فى الهوا.. قعدنا نسقفله و نقوله .. دكر .. و راجل .. و كلام تانى قبيح.. و بعدين سمعنا انهم ابتدوا يقبضوا على ناس .. ف استخبينا فى مكان مش هقول عليه .. و عرفنا انهم هيطبقوا حظر التجوال.. استنينا شويه و بعدين سيبنا المخبا.مشينا فى شوارع جانبيه لحد رمسيس..و هناك لقينا مسيره بتهتف ضد العسكر بس صغيره قوى . انا كنت تعبان فشخ فروحت.. دى كانت شهادتى .. عايز تصدق صدق .. مش عايز متصدقش

الصورة السودة دى مسموح لكم تكتبوا فيها اللى نفسكم فيه

حقى

مدونتى القديمة اللى كنت بكتب فيها من خمس سنين كانت عن حقوق الاقباط ... كنت بكتب فيها كتير جدا و كنت مؤمنه قوى بقضية الاقباط و حاسه ان محدش بيتكلم باسمهم و انهم مظلومين و مش بيتعاملوا زى باقى الناس فى البلد .. بالعكس بيتعاملوا كأقلية ضعيفة حتى  مش من حقها انها تطلب حقها ... لما المدونة اتسرقت مافكرتش اعمل غيرها .. ياترى ليه؟؟؟؟ فى الوقت ده حسيت انى بكتب ليا اكتر من سنتين و مفيش حاجه بتتغير .. حسيت ان الناس مش بتسمع و كان كل اللى بيتقال انكم بتهيجوا الدنيا و بتشقوا وحدة الصف المصرى !!!! التعليقات كانت بتدل اننا ناس عايشين فى اوهام الاضطهاد ...
اعترافى ليكم فى السطور الجاية ممكن يبقى غريب عليكم ... بس لما قررت اكتب تانى قررت ده لانى شفت ان مش بس المسيحيين اللى مضطهدين .. انا كنت عايشه فى دايرة مقفوله .. كانت نظرتى صغيرة و ضيقه .. ماكنتش شايفة غير الاقباط.
لكن دلوقتى اقدر اقولكم و بالفم المليان ان كل مصر كانت مضطهدة كل واحد معندوش ضهر يسنده كان مضطهد و كمان اسفه انى اقول انه "و مازال " مفيش حاجه اتغيرت ... يعنى لما 26 شهيد فى كنيسة فى احتفال رأس السنة يموتوا و حقهم ما يجيش ده مش لانهم مسيحيين .. ده لان البلد مفيش فيها قانون .. ده لان ابن الباشا القاضى مامتش معاهم .. نفس الوضع فى كل شهداء الثورة برضه لان ابن سيادة الوزير ماكنش فيهم ... تعالوا نتخيل موقف القيادات من الناس اللى بتقول "عايزين حقنا" شايفينا ناس تافهه مش وراها حاجه بأجندات خارجيه و مندسين و هدفنا الوحيد اننا نخرب البلد و نقعد على تلها .. عايزة بقى اقولك يا باشا انت و هو ان البلد اصلا خربانه - يمكن انت ماتبقاش شايفها كده لانك قاعد فى برج عاجى و مش حاسس بالناس و مش عايش التجربة .. لكن كل واحد فيكم يحط نفسه مكان واحد من الناس اللى بتطالب بحقها .. و اسأل نفسك انا لو مكانه هاطالب بحقى ليه؟؟؟؟؟؟ يمكن ساعتها بس تعرف و تحس بينا.


امبارح دار حوار غريب بينى و بين امى .. قعدت تتكلم على الاقتصاد الواقع و الكلام ده و تقوللى هو الاقتصاد هايتحسن ازاى و كل الناس مضربين و كل حاجه فى البلد واقعه .. قلتلها حطى نفسك مكان العمال دول لو انتى مش بتقبضى مرتبك و مش عايشه حياة محترمة كريمة هل هاتبطلى تشتغلى ولا لأ؟؟؟ ردت عليا و بدون تردد او تفكير و قالتلى طبعا مش هاشتغل .. قلتلها يبقى ماتحاسبيهمش على انهم بيطلبوا حقهم قبل ما تحطى نفسك مكانهم ...


فى كلام تانى كتير جوايا و جوا كل الناس فى الموضوع ده و كلام كتير اتقال و بيتقال و هايتقال .. و للاسف الحكومة اللى -قال ايه- خرجت من رحم الثورة عاملة ودن من طين و التانية من عجين ...


انا عايزة حقى فى المساواة فى العدل .. عايزة حقى فى قضاء نظيف .. عايزة حقى فى مرتب يكفينى اعيش .. عايزة اعيش حرة .. عايزة و عايزة و عايزة ......... 

اسمعونا بقى منكم لله

الفقراء اولا يا ولاد الـ ..

بيقولك ايه بقى يا سيدى ... ان مصر دولة مؤسسات .. هو لامؤاخذة يعنى فى السؤال : يعنى ايه مؤسسات .. 
انا بقى هاعرفلكم المؤسسات حسب ما انا شايفاها
مؤسسة يعنى تلاقى واحد قاعد فى مكتبه المكيف و فى ايده السيجار بتاعه و حواليه الحاشية بتاعته بيأكلوه و يشربوه و يهننوه و بيقبض اكتر من مليون جنيه فى الشهر..و فى نفس المؤسسة تلاقى واحد قاعد فى مكتب برضه بس مرتبه اقل شوية يعنى ممكن نقول نص مليون و بتختلف شكل المكاتب من دور لدور و الغريب ان كل ما منظر المكتب بقى اسوأ كل ما المرتب قل و كل ما الشغل بقى كتييير ..  بتضايق جدا من عامل النظافة اللى فى الشارع .. اللى بيلم "سورى فى الكلمة" زبالتنا اللى بنرميها بمزاجنا طول النهار ياعينى فى الشمس ماشى فى الشارع بيشتغل و مطحون و مرتبه كام؟؟؟ 120 جنيه ........ بذمتكم مؤسسات ايه اللى بتتكلموا عليها و عدل ايه اللى بتتكلموا عليه .. هو مش المفروض ان اللى يشتغل اكتر ياخد اكتر؟؟؟ الواضح انكم بتدوا الغلابى دول اكتر بس حاجات تانى غير الفلوس .. فقر و ذل و قهر .. دول اللى انتوا نجحتوا قوى فى انكم تدوه للناس دى ... امتى هانسمع اخيرا ان فى عدل فى البلد و مايبقاش فى كبير و صغير مايبقاش فى بشوات و صعاليك؟؟؟ 
مش عارفه انا ليه كتبت عن الموضوع ده ... يمكن لانى لسه جايه من برة و الشمس حارقه ما استحملتش امشى فيها 5 دقايق و انا شايفه ناس كتير فى الشارع مطحونه علشان اخر الشهر تديها 120 جنيه !!!!! 
و لاننا كنا متوقعين ان الثورة هاتغير الوضع للاحسن و هاتحط حد للمهزلة دى لكن للأسف الوضع من سيئ لاسوأ 
اسمحولى ارفع شعارى اللى متمسكة بيه من ساعة ما بطلت عيشة الفلول

"الفقراء اولا يا ولاد الكلب"

من اول السطر

الحقيقة هو مش من اول السطر .. هو أول سطر
كتير فى الفترة اللى فاتت كنت بفكر اعمل مدونة بعد ما نسيت مدونتى القديمة و بطلت اكتب من اكتر من خمس سنين ,, لكن فعلا ماكنتش ببقى عارفه هاكتب ايه .. طيب هو فى حاجه انا عايزة الناس تعرفها .. طيب ياترى هاتكلم عن ايه سياسة ولا حقوق انسان ولا فى البلد اللى خربانه ولا فى الفن ولا اهزر ولا اخليها مدونة نكت "اصل دى اكتر حاجه منتشرة اليومين دول" .. المهم يا سادة يا كرام قررت انى اسمى مدونتى اى كلام و اكتب فيها اى كلام فى اى حاجه .. اكتب بفكر فى ايه , نشارك بعض بأفكارنا و نتكلم و نطلع اللى جوانا .. الفكرة دى ناجحة جدا فى اننا نوصل لحلول فعلية لاى مشكلة تواجهنا و غير كده كمان بتعلمنا نوسع دايرة تفكيرنا و توقعاتنا و بكده كمان نسبه نجاح فكرتنا بيكون كبير
انا بطبيعتى مش رغاية .. انا بس كتبت الموضوع ده علشان اعرفكم انى رجعت لكم .. هاكتب تانى و هاقول اللى بحسه و اللى شايفاه .. يمكن تكون نظرتى على قدى للامور ساعدونى فى انكم تكبروها معايا و علشان كده رجعت اكتب !!!